Yaranma səbəbi və təşəbbüs qrupu.

Qloballaşma prosesinin sürətlə getdiyi dövrdə Azərbaycanın beynəlxalq təhsil məkanına inteqrasiya sahəsindəki uğurlu siyasətinin nəticəsi olaraq azərbaycanlı gənclər dünyanın qabaqcıl ölkələrində təhsil almaq imkanı qazanırlar. Koreya Respublikası da bu ölkələr sırasındadır və 2008-ci ildən burada təhsil alan azərbaycanlıların sayı nəzərə çarpacaq dərəcədə artmaqdadır.

 

Sıralarının genişlənməsi Koreyada azərbaycanlı tələbələrin təşkilatlanması zərurətini yaratmış, bu məsələni Koreyadakı azərbaycanlı tələbələrin müzakirə etməsi üçün internet forumu yaradılmışdır. Təşkilatlanma istiqamətində fikir mübadiləsi aparılaraq tələbələrin rəyləri öyrənilmişdir.

 

Müzakirələrin sonunda Koreyada azərbaycanlı tələbələrin təşkilatının yaradılması üçün təşəbbüs qrupu yaradılması qərara alınmışdır. Tələbələrin bu təşəbbüsünü Azərbaycanın Cənubi Koreyadakı səfirliyi yüksək qiymətləndirərək tələbələrin təşkilatlanmasında maddi və mənəvi dəstək olmuşdur.


Təşkilatın təsis konfransı

8 mart 2009-cu ildə təşəbbüs qrupunun iclası keçirilmiş, yaradılacaq təşkilatın gələcək perspektivlərindən söhbət açılmışdır. Müvafiq olaraq nizamnamə layihəsi hazırlanmış və təşkilatın təsis konfransının keçirilməsi üçün hazırlıq işlərinə başlanılmışdır.

21 mart 2009-cu ildə Cənubi Koreyanın paytaxtı Seul şəhərində təsis konfransı keçirilmiş və təşkilata rəmzi olaraq Azərbaycan xalqının milli xüsusiyyətlərini özündə əks etdirən “BUTA” adı verilmişdir. 2009-2015-ci illərdə assosiasiya öz fəaliyyətini qeyri-rəsmi şəkildə davam etdirmişdir.

 

10 fevral 2015-ci ildə BUTA Azərbaycan-Koreya Dostluq Assosiasiyası olaraq Cənubi Koreyada rəsmi qeydiyyatdan keçmişdir.


Fəaliyyət istiqamətləri

BUTA Azərbaycan-Koreya Dostluq Assosiasiyası, Cənubi Koreya Respublikasında Azərbaycanın diaspora fəaliyyətini təmin etmək məqsədi ilə fəaliyyət göstərir. Əsas fəaliyyət istiqamətləri Koreya Respublikasında yaşayan azərbaycanlıların təşkilatlanması, onlar arasında milli birliyin və həmrəyliyin möhkəmləndirilməsi, Azərbaycan xalqının tarixi, müasir həyatı, sosial-iqtisadi inkişaf səviyyəsi, mədəniyyəti ilə bağlı məlumatların Koreya ictimaiyyətinə çatdırılmasından ibarətdir.

Bununla yanaşı assosiasiyanın məqsədi Azərbaycan və Koreya arasında elmi-mədəni, gənclər mübadiləsi və sənaye texnologiyaları üzrə əməkdaşlıq yolu ilə iki ölkə arasında dostluq və birgə rifahı təşviq etməkdir.